erna in london

ech verzöue euch jez mou wie mer das in london so macht:-)

ech be also retour gange ond ha am nöchschte tag grad mol weder eine döre gäh met schafe bes jez... das ganze hed am friitig scho mol weder ganz verreckt agfange, aber ech verzelle euch nor s ganz öberegheite! am samschtig esch eus i de bar d gläserwäschmaschine kapott gange ond natürlech hed das öber neujohr niemer vo dere firma chöne go flicke... was heisst das? jawohl, alli gläser hend mösse is restaurant ufetreid wärde, dete inere vöu chlinere maschine gwäsche wärde ond de weder abetreid wärde. das an ond för sech wär jo ned sooooooooooooones riiiiiiiiiiiiise problem, wenn ned silväschter wär....also stelled euch jez mol vor.... im restaurant esch d höll los! es esch gschtopfed voll ond ech ha ned mol ziit gha zom täller potze ond id chochi schecke zom wäsche, d bartheke im restaurant esch eh vöu z chli ond plötzlech schtönd no öberall gläser vo de bar donde... ech cha mech chum meh bewege ond de stössled no eine ome wo of sini gläser wartet.... d bar donde esch au gschtosse vou ond si hend weder wodka no eis no suberi gläser no sösch hondert sache gha;-)jo das esch abgange...
aber im endeffekt heds de wenigschtens öpis guets gha: mer hend am haubi zwöufi de ganz lade dicht gmacht, am zwöufi ofs neujohr agschtosse ond s füürwärk im färnseh gluegt. de räscht vom obe werd ech öich vellecht mol in bilder zeige, aber es esch loschtig gseh...
höt han ech natürlech mol weder open to close gschaffet met z wenig schlof ond zwe drüü andere problemlis :-) allerdings hend mer höt so zemlech ke z ässe gha ond es esch eifach lächerlech gseh, dass mer wiiter ofe gha hend... mer hend ab de 2ne ke fish & chips meh gha ond ca. ab de 4e gar ke chips ond ou sösch nüd meh gha. öpe de han ech d wahl gha zwösche "lachen oder weinen" ond ech ha mech förs erschte entschiide... man esch dä tag loschtig gseh... ehr chönd euch ned vorstelle wie vell wetze ech gmacht ha öber das... ond zom glöck hends die meischte chonde ou locker gnoh.... ond so wiit ech weiss, heds i de meischte andere pubs det omenand ned besser usgseh met em menu... aber de bescht chond no... am haubi sebni hend mer de de lade dichtgmacht ond ca. am viertel vor sächsi esch es italienisches päärli cho ond ech ha ehne gseid, dass mer vell äbe nöme hend.de hend mech zwöi met grosse auge agluegt ond ech has nomol gseid, eifach met andere wörter. no die grössere auge. ech has auso nomol probiert ond nomeno s nötigschte gseid (also ke verbe, ke adjektiv ond scho gar ke artikel oder so) ond i dem "satz" esch s wort food vorcho. bi dem wort hend beidi gnickt ond gseid: "yes, food, yes food". de heds mer glänged ond ech ha ehne gseid, wartet do ech be gli zrog (was si eh ned verschtande hend) ond be id bar abe zom eusi italienischi servierdüse go hole (do muess ech erwähne, dass ehres english ou schlächt esch! sehr schlächt!) ond ha zo ehre gseid: chasch bitte för 2 minute öberufe cho? ond ha debi zwe finger zeigt för die zwe minute. ond was macht si? ? ? packt zwöi guinness gläser ond seid: yes two guinness! ond fohd afo bier useloh... de heds mech doch eifach verjagt vor lache....

somet... ech wönsche euch ganz es guets neus johr ond hend sorg zo euch!

26/01/07

ha no es paar bilder gfonde vo neujohr...


i de metti esch mini chefi ond rechts die obe erwähnti italienerin


so öpis wie mine beschti london kollege...


jo, es paar hend chli vell champagner gha :-)